बर्दिबास, १० साउन ।

हाम्रो मायाघर निर्माणार्थ सहयोगका लागि आयोजना हुन लागेको शिवपुराण माहयज्ञबारे बर्दिबासमा चासो र सहयोगका प्रतिबद्धता बढ्दैछन् ।

बर्दिबास-२ मा करिब ११ करोडको लागतमा निर्माण हुने हाम्रो मायाघर निर्माणार्थ सहयोगका लागि यही साउन २१ देेखि २९ सम्म बर्दिबास-१ मा आयोजना हुने शिवपुराण महायज्ञका लागि सहयोगी हात थपिदै गएका हुन् । आज बिहीबार होटल तथा पर्यटन व्यवसायी सङ्घ महोत्तरी र यातायात व्यवसायीले महायज्ञमा सहभागी हुनेहरुका लागि विशेष छुटको घोषणा गरेका छन् ।

होटल तथा पर्यटन व्यवसायी सङ्घ महोत्तरीले महायज्ञमा आउने पाठ पारायण र कथा वाचन गर्ने विदुषी राधिका दासी नेतृत्वको पण्डित टोलीको निशुल्क खाना तथा आवासको घोषणा गरेको छ । यसैगरी सङ्घले शिवपुराण महायज्ञमा सहभागी हुने स्रोताहरुका लागि आबासमा २५ र खानामा १५ प्रतिशत छुट गर्ने निणर्य गरेको अध्यक्ष गुञ्जबहादुर कार्कीले जानकारी दिनुभयो । सङ्घ र महायज्ञ आयोजक समितिको सचिवालयसँग आजै भएको संयुक्त बैठकमा यस्तो सहमति भएको हो । सङ्घले महायज्ञ आयोजक समितिको सचिवालयलाई निशुल्क कार्यालय पनि उपलब्ध गराउने सहमति गरेको छ ।

यस्तै बर्दिबासका यातायात व्यवसायीले महायज्ञ अवधिभरि सहभागी हुन आउनेहरुका लागि भाडामा ३० प्रतिशत छुट दिने घोषणा गरेका छन् । आज बिहीबार नै यातायात व्यवसायी सङ्गठनहरु सुनौली बिपी यातायात, अटो एनएसटिडी सेवा, कविता यातायात प्रालि र भवानी यातायात प्रालि (माइक्रोबस)का प्रतिनिधिले महायज्ञमा कथा श्रवण गर्न आउने श्रद्धालुहरुका लागि ३० प्रतिशत भाडा छुटको घोषणा गरेका छन् । महायज्ञबारे बढ्दो चासो र दिनदिनै भइरहेका सहयोग घोषणाले आपूmहरु उत्साहित भएको महायज्ञ आयोजक समितिका अध्यक्ष हिरालाल गौतमले बताउनुभयो ।

“हामी मानवीय सहयोगको पवित्र ध्येयप्रति समर्पित छौं, महायज्ञबारे बढ्दो चासो र सहयोगका प्रतिबद्धताले हौसला थपेको छ” नेपाल होटल तथा पर्यटन व्यवसायी महासङ्घ मधेश प्रदेश र बर्दिबास नगरपालिकाको संस्कृति तथा पर्यटन प्रबद्र्धन समितिका अध्यक्षसमेत रहनु भएका गौतमले भन्नुभयो, “महायज्ञबारेको चासो र सहयोगले हाम्रो मायाघर चाँडै बन्ने विश्वास जाग्दै गएको छ ।” करिब २५ लाख खर्च हुने महायज्ञबाट हाम्रो मायाघर निर्माणार्थ दुई करोड सहयोग जुट्ने गौतमको विश्वास छ ।

बर्दिबास-२ मा निर्माण हुने हाम्रो मायाघरका लागि दाताबाट जग्गा प्राप्त भएर सोको पक्की घेराबेरा पनि भइसकेको छ । निर्माण हुने हाम्रो मायाघरमा सडक मानव तथा आश्रयविहीनहरुसमेत २०० को व्यवस्थापन गरिने जनाइएको छ ।

बालबालिका तथा अपाङ्गता मैत्रीसहित भूकम्प प्रतिरोधी दुईवटा भवनको विस्तृत परियोजना प्रस्ताव तयार भएको छ । अत्याधुनिक सुविधासहितको दुई भवनमध्ये एउटा दुई तले र अर्को चार तले बन्नेछ । काम थालिएको पाँच वर्षभित्र निर्माण सम्पन्न हुने लक्ष लिइएको यो भवनमा सहयोगका लागि हाम्रो मायाघर बर्दिबास समितिले सार्वजनिक अपिल गरेको छ ।