विशाल बस्नेत,
महोत्तरी : राष्ट्रिय प्राकृतिक स्रोत तथा वित्त आयोग कार्यसम्पादन मुल्यांकनमा महोत्तरीका स्थानिय तहहरु कमजोर देखिएका छन ।
स्थानिय सरकारको कार्यसम्पादन गर्न प्रयोग गरिएका सुचक तथा विवरणको आधारमा आईतवार प्रकाशित मुल्यांकनमा जिल्लाका अधिकांश स्थानिय तह कमजोर देखिएका हुन । कतिपय स्थानिय तहहरुले सवैभन्दा धेरै अंक ८० ल्याएतापनी महोत्तरीका स्थानिय तह भने ४७.३३ भन्दा माथी उक्लन सकेका छैनन ।
४७.३३ अंक ल्याएर जिल्लामा नै पिपरा गाउँपालिका पहिलो वनेको छ । सवैभन्दा कम अंक ३०.७० ल्याउनेमा सोनमा गाउँपालिका वनेको छ ।
पिपरापछी बर्दिवास नगरपालिका ४६.८५ अंक ल्याएर जिल्लाको नै दोश्रो वनेको छ । त्यसपछि क्रमश महोत्तरी गाउँपालिकाले ४६.६६, भंगाहा नगरपालिकाले ४६.२०, लोहारपट्टी नगरपालिकाले ४४.८३, मनरासिस्वा नगरपालिकाले ४३.०३ प्रतिशत अंक प्राप्त गरेको राष्ट्रिय प्राकृतिक स्रोत तथा वित्त आयोगले जनाएको छ ।
त्यस्तै रामगोपालपुर नगरपालिकाले ४२ अंक, जलेश्वर नगरपालिकाले ४१.०१, सम्सी गाउँपालिकाले ४०.६९ अंक, बल्बा नगरपालिका, औरही नगरपालिका र एकडारा गाउँपालिकाले ३९ अंक, मटिहानी नगरपालिकाले ३६.३१ अंक प्राप्त गरेको राजेश्वरी खत्री सापकोटाले जानकारी दिइन ।
वित्त आयोगले विभिन्न १७ वटा सुचकको आधारमा कार्यसम्पादन मूल्याकंन गरेको थियो । निर्धारित समयमा गाउँसभा, नगरसभा नगरेको देखि विधुतिय अनलाइन पोर्टलमा कार्यसम्पादन सुचक सम्बन्धि विवरण तोकिएको अवधीमा प्रविष्टि नगरेको विषयलाई समेत सुचकमा अंकभार निर्धारण गरेको छ ।
यो सुचकमा त बर्दिवास, औरही, भंगाहा, बल्वा, एकडारा, महोत्तरीले त शून्य अंक प्राप्त गरेका छन ।
१७ वटै सुचकमा जिल्लाका स्थानिय तह कमजोर वनेसगैँ आयोगको सिफारिशमा प्रदेश र संघ सरकारले आर्थिक बर्ष २०८१/८२ मा उपलब्ध गराउने वित्तिय समानिकरण अनुदान कटौती हुनेछ । न्यूज कारखाना
२०८१ फाल्गुन २६, सोमबार ११:४९मा प्रकाशित
