जनकपुरधाम : धनुषाको १८ वटै स्थानीय तह क्वारेन्टाईन निर्माण गरेको छ । भारतीय सिमानाकाबाट नेपाली नागरिकहरु व्यापक रुपमा भित्रन थालेपछि व्यापक आलोचना खेपेको जनकपुरधाम उप–महानगरपालिकाले समेत ५० बेडको क्वारेन्टाईन निर्माण थालेको छ । उपमहानगर अल्लमल्लमै रहेको बेला वडा कार्यालयको सञ्चालित क्वारेन्टाईन भने जिल्लाकै नमूना क्वारेन्टाईन बनेको छ ।

धनुषाको जनकपुरधाम उप–महानगरपालिकाको वडा नं. ७ ले निर्माण गरेको क्वारेन्टाईन नमूना क्वारेन्टाईन बनेको छ । विश्व स्वास्थ्य संगठनको सुझावलाई समेटदै नेपाल सरकारले कोरोना (कोभिड–१९) सम्बन्धी क्वारेन्टाईन सञ्चालन तथा व्यवस्थापन सम्बन्धी बनेको मापदण्ड २०७६ लाई टेक्दै बनाएको क्वारेन्टाईन नमूना क्वारेन्टाईन बनेको छ ।

(जनकपुरधाम उप–महानगरपालिका ७ वडा कार्यालयले बनाएको नमूना क्वारेन्टाइन : गोबिन्द महतो)

वाईफाई सुविधा सहित अत्यावश्यक मापदण्ड तोकि सञ्चालित क्वारेन्टाईन कसरी निर्माण गर्ने र कस्तो हुनुपर्छ वा कस्तो वातावरण सम्भावित संक्रमित वा संक्रमितको लागि आवश्यक हुन्छ भन्ने नमुना वडा कार्यालयको क्वारेन्टानबाट सिक्नुपर्ने सहायक प्रमुख जिल्ला अधिकारी शरदकुमार पोखरेलले बताए । उनले भने, ‘हाम्रो टोली दुई–तीन पटक जनकपुरधाम उप–महानगरपालिका वडा नं. ७ का अध्यक्ष जानकीराम साहजीले बनाएको क्वारेन्टाईन्मा पुग्यौ, त्यहाँबाट अन्य स्थानीय तहले पनि सिक्नुपर्छ, की क्वारेन्टाईन बनाउन पैसा चाहिदैन, ईच्छाशक्ति भए पुग्छ ।’

सहायक प्रमुख जिल्ला अधिकारी पोखरेलले धनुषाको मिथिला, धनुषाधाम, हंसपुर, शहिद लगायतका नगरपालिकाले क्वारेन्टाईन देखि खाना र सरसफाईमा राम्रो व्यस्थापन गरेको बताउँदै भने, ‘स्थानीय तहहरुले गरेका कामको प्रशंसा गर्नुपर्छ, तर वडा कार्यालयले गरेको कामको अझ प्रशंसा गर्नुपर्छ, हामीले गर्न चाहे जेपनि हुन्छ भन्ने सन्देश ७ नं. वडा अध्यक्ष ज्युले दिनुभएछ ।’ नेपाल पत्रकार महासंघ धनुषाका अध्यक्ष अनिल मिश्रले वडा कार्यालयले क्वारेन्टाईनमा देखाएको व्यवस्थापन चुस्त चुरुस्तको प्रशंसा गरे । उनले भने, ‘कसरी बस्ने, के कस्ता सामाग्री आवश्यक पर्छ, डिस्टान्स कति राख्ने, सरसफाई, खानपान, शैचालय, स्नानघर, सञ्चार सुविधा, बिद्युत, पानी, ओढना–विछयौना, झुल सहितको नमुना व्यवस्थापन हामील वडा कार्यालयबाट सिक्नुपर्छ ।’

हाल भारतीय सिमानाका हुँदै नेपाल फर्किने नेपालीहरुको संख्या बढ्दै गएको बेलामा क्वारेन्टाईन आवश्यक पर्ने भएकोले सबै स्थानीय तहलाई क्वारेन्टाईनको क्षमता बढाउन आग्रह गरिएको धनुषाका प्रमुख जिल्ला अधिकारी कोषहरि निरौलाले जानकारी दिए । कोरोना भाइरसको त्रास फैलिरहेका बेला र्न सक्ने जोखिमलाई हल गर्नका लागि सबै स्थानीय तहलाई पूर्वतयारीमा बस्न आग्रह गरेका छौं, निरौलाले भने, ‘भारतीय सिमाबाट नेपालीलाई ल्याएर सम्बन्धित स्थानीय तहलाई जिम्मा लगाउने काम जारी छ, संख्या अझ बढन सक्नेछ, त्यसैले सम्भावित जोखिमलाई मध्यनजर गरेर सबैलाई तयारी अवस्थामा रहन भनेका छौं ।’

२०७७ जेष्ठ ८, बिहीबार १६:३५

प्रतिक्रिया

सम्बन्धित खवर

ताजा समाचार

लोकप्रिय