जनकपुरधाम : प्रदेश २ को अस्थायी राजधानी जनकपुरधाम अत्यधिक फोहोर बनेपछि विरोध सुरु भएको छ ।

युवा अभियन्ता सरोज मिश्रले फोहोरको थु्प्राे विरोध स्वरुप ‘भ्रष्टाचारी मेयर–उपमेयर मुर्दावाद’ नारा लेखिएको प्लेकार्ड राखेका छन् । फोहोर व्यवस्थापन गर्न पटक पटक जनप्रतिनिधिहरुको ध्यानाकर्षण गराउँदा पनि चासो नदेखाएपछि फोहोरकै थुप्रोमा मेयर–उपमेयरविरुद्ध नारा लेखिएको प्लेकार्ड फोहोरका थुप्रोहरुमा राख्न थालेको बताएका छन् ।

उनले सामाजिक सञ्जालमा लेखेका छन्, ‘ध्यानाकर्षणको आज २७ औं दिन । भ्रष्ट, फोहोरी मेयर–उपमेयर मुर्दाबाद । फोहोर ब्यवस्थापनको नाऊमा पर्सनल कमिशन बन्द गर । भ्रष्टाचार बन्द गर । स्थानीय सरकार मुर्दाबाद । जाग जाग जाग जनता, यस्ता भ्रष्टहरुबिरुद्ध लाग जनता । भोलि बोड लेख्ने ।’

कर्मचारीको लापरबाही र जनप्रतिनिधिको बेवास्ताका कारण जनकपुरधाम फोहोरले कुरुप बनेको छ । यहाँका मेयर लालकिशोर साहले फोहोर फाल्ने ‘डम्पिङ साइट’का लागि हरेक वर्ष बजेट विनियोजन गरेपनि निर्माण गराउन सकेका छैन ।