काठमाडौं : अभिनेत्री साम्राज्ञी आरएल शाह र अभिनेता भुवन केसीबीच गएको हप्तासम्म सामाजिक सञ्जालमा जुहारी चलेको थियो । साम्राज्ञीले फिल्म ‘ड्रिम्स’ को सेटमा आफूमाथि नराम्रो व्यवहार गरेको र जापान अवार्डमा दुव्र्यवहार गरेको आरोप लगाएपछि भुवनले ‘जुन थालमा खाने त्यही थालमा दुलो पार्ने’ भन्दै फेसबुकमा आक्रोशपूर्ण स्टाटससँगै कलाकार संघमा साम्राज्ञीविरुद्ध उजुरी पनि दिए ।
अभिनेता केसीले साम्राज्ञीलाई पितातुल्य व्यक्तिको सामाजिक सञ्जालमार्फत् झुटा र अनर्गन प्रचार नगर्न र पुनः यस्ता गतिविधि दोहोर्याए साइबर क्राइमको मुद्धा हाल्ने चेतावनी समेत दिएका थिए । यसपछि साम्राज्ञीले सामाजिक सञ्जालमा अर्को कुनै भिडियो सार्वजनिक गरेकी छैनन् । भुवन भने केही सञ्चारमाध्यममा आफ्नो चरित्रमाथि गम्भीर प्रश्न उठेको भन्दै दुखेसो पोखिरहेका छन् ।
यसबीच, साम्राज्ञीले शनिवार इन्टाग्राममा एक पोस्ट गर्दै आफूले केही नगरेको भनेर लेखेकी छन् । अभिनेता केसीले अन्तर्वार्तामा आफूमाथि झुटा आरोप लगाइएको भन्दै अभिव्यक्ति दिइरहँदा साम्राज्ञीको यो वाक्यांशलाई दुई रुपमा अर्थ्याउन सकिन्छ । पहिलो, उनी अब विवाद लम्ब्याउने पक्षमा छैनन् । दोस्रो, आफूले गल्ती नगरेकाले चिन्तारहित रहेको उनको आशय हुनसक्छ ।
२०७७ श्रावण ३, शनिबार २२:४५मा प्रकाशित
