बर्दिया : कोरोना भाइरस संक्रमितको उपचारका लागि बर्दिया सदरमुकाम गुलरियामा २० शय्याको आइशोलेसन सेण्टर निर्माण शुरु भएको छ । जिल्ला समन्वय समितिको सभागृह रहेको भवनमा पाँच दिनभित्र आइसोलेशन सेण्टर बनाइने जिससका संयोजक शंकरप्रसाद थारुले बताउनुभयो ।

उक्त भवनमा पाँच शय्या थपेर २५ शय्यासम्मको आइसोलेसन सेण्टर बनाइने जनाइएको छ । आइसोलेसन सेण्टर बनेपछि जिल्लामा कोरोना संक्रमित भेटिएका अवस्थामा त्यहीँ राखेर उपचार हुने छ । बर्दियामा कोरोना अस्थायी अस्पतालको चौतर्फी माग हुन थालेपछि जिससको भवनलाई कोरोना विशेष आइशोलेसन कक्षका रुपमा विकास गर्न लागिएको हो ।

छिमेकी जिल्ला बाँकेमा दिनप्रतिदिन कोरोना संक्रमित बढ्दै जाँदा र भारतबाट बर्दियाबासी पनि जिल्ला भित्रिने क्रम बढेसंँगै उच्च जोखिममा रहेको बर्दियामा थप समस्या आउन नदिनका लागि कोरोना विशेष उपचार केन्द्र आवश्यक रहेको थियो । बर्दियामा पनि कोरोनाको संक्रमण देखिएको र प्रदेश नं ५ को छिमेकी जिल्लामा हरेक दिन बढ्दै जान थालेपछि उपचारमा सहजता ल्याउन कोरोना विशेष आइशोलेसन सेण्टर निर्माण गर्न लागिएको प्रमुख जिल्ला अधिकारी प्रेमलाल लामिछानेले बताउनुभयो ।

सेण्टरका लागि जिल्लाका आठ वटै स्थानीय तहले आर्थिक सहयोग गर्ने भएका छन् । हाल सबै पालिकाले रु पाँचपाँच लाखका दरले बजेट विनियोजन गर्ने प्रतिबद्धता जनाएका छन् । रकम अपुग भए अन्य स्रोत परिचालन गरिने र सेण्टरमा प्रयोग हुने जनशक्ति तथा स्वास्थ्य सामग्री स्वास्थ्य कार्यालयबाट उपलब्ध गराइने जिससका संयोजक थारुले बताउनुभयो ।

कोरोना संक्रमित सम्भावित बिरामीलाई दृष्टिगत गरी बर्दियामा भविष्यमा मापदण्डसहितको दुई सय शय्याको आइशोलेसन सेन्टर निर्माण गरिने प्रजिअ लामिछानेको भनाइ छ । जिससको सभागृह रहेको भवनसँगै बढैयाताल गाउँपालिका तथा बारबर्दिया र राजापुर नगरपालिका रहेका प्राथमिक स्वास्थ्य केन्द्रमा पहिलो चरणमा आइसोलेशन तयार हुँदै छन् ।